Med sin fine balansegang mellom solid, nøktern sakkunnskap og kjenslevar innleving, særleg formidla gjennom illustrasjonane - er denne boka eit must for alle som er glad i fjellet.
Dette er ei ungdomsbok om natur og dyreliv i fjellet, samspelet i naturen, og om samspelet mellom menneske og natur. Men det er óg ei skildring av ungdommeleg nyfikne, av kjærleik til både menneske og dyr, og ikkje minst av eit sterkt og positivt tilhøve mellom far og dotter, som er hovudpersonane i boka.
Boka er skriven på nynorsk og må reknast som ei av få forteljande sakprosabøker for born og ungdom innafor dette emnefeltet. Ho er informativ, pedagogisk veloppbygd, og lesaren sit att med både naturkunnskap og menneskekunnskap. Mange av skildringane gir grunnlag for sterk ettertanke.
Boka er høveleg for ungdom i alderen ti til femten år, men ho kan gjerne lesast av alle aldersgrupper. Boka er lettlesen, og lesaren får ei sterk kjensle av sjølv å vera med på opplevingane i fjellet.
