Boka "Skipsteknikk" byggjer på læreplanen for Teknisk fagskole, linje for maritime fag og fiskerifag, fastsett juni 1998. Ho er dessutan i samsvar med STCW-konvensjonen og dekkjer krava til kunnskap og forståing slik dei er definerte i STCW-koden A-III/2. Boka har tre kapittel. I det første kapittelet blir konstruksjonen og sjødugleiken til skipet omtala. Forfattaren tek mellom anna for seg dei ulike skipstypane, konstruksjonen til skipet, storleiken, forma og dei hydrostatiske eigenskapane. Vidare handsamar boka forskriftene for bygging av skip, belastningar på skip, inspeksjon og vedlikehald. I kapittel 2 er temaet tilsyn med skip, dvs. skipsregistrering, skipsmåling og lastelinjekonvensjonen, offentleg tilsyn og klassing av skip. Det tredje kapittelet dreier seg om skipskonstruksjon, mellom anna skipsbyggjematerialar, korrosjon og skadar på tankar, lasterom osb. I tillegg til dei tre kapitla inneheld boka vedlegg med krengeprøveprosedyre for skip, utdrag av forskrifter for bygging av skip og oversyn over sertifikat for handelsskip. Dei mange døma og oppgåvene i boka skal lette forståinga for og innlæringa av stoffet. Ansgar Lund er utdanna ved Sjøkrigsskolen og NTH. Han har tidlegare vore maskinsjef, prosjektleiar ved fleire verft både i og utanfor Noreg og overingeniør ved Wichmann Motorfabrikk. Dei siste 16 åra har Lund vore engasjert i undervisning. I dag arbeider han ved Bergen maritime videregående skole.
